Message 1: My first week!

Myn earste wike, hy sit der alwer op. In wike mei in soad gereisg, soad geregel, strakke planning. Wie ik net nei Australië gongen om lekker restich oan te dwaan....? Ja fansels! It wie ek in wike mei in nije omjouwing, nije yndrukken, nije freonen, hearlike temperatueren en fansels Hong Kong en Sydney! Wurdt it jimme no al tefolle? Sorry derfoar, lit ik begjinne by it begjin....

Tsjah, der steane hja dan op Schiphol Airport. It is tongersdei 4 oktober, fanôf no wurdt it dan eindeliks allegearre werkelykhyd. Aanst mei in tweintichtal reisgenoaten it fleantúch yn en dan pas wer foet op Nederlânske bodem sette ergens yn april/maaie 2008. De reis giet earst nei Hong Kong, dizze flucht beslaat 12 oeren. Dernei ha we mar leafst 16 oeren te besteden yn dizze Aziatyske metropoal foardat it fleantúch syn reis ferfolget rjochting Sydney. Dizze flucht duorret dan noch sa'n 8 oeren. Yn de rij foar it ynchecken kom ik drekt in oprjochte Frys tsjin, Roel Bosma, út Weidum ek noch wol. Hy is ek mei dizze trip mei. Sa kin ik moai myn Frysk taalgebrûk op peil hâlde en kom ik net mei in Australisch accent werom!

Oer de flucht kin ik koart wêze; foar minsken mei myn lingte is it net oangenaam reizgjen. Ek Hong Kong wie net om oer nei hús ta te skriuwen. Ek hjir wol ik eins net tefolle wurden oan smoarch meitsje. Want smoarch wie it yn Hong Kong! De muffe oerhearskjende geur hong my al nei 2 sekonden de noas út. Derneist wie it ek nochris drukkend waarm. Dit alles soarge foar it net echt posityf totaalbield fan dizze miljoenenstêd. Gjin oanrieder wat my betreft. We ha dy dei noch wol in citytour dien en dat wie it dan ek. Foar de rest ha we noch hiel efkes sliepe kinnen yn ús 'hotel' dêr.

Derom no mar snel troch nei Sydney! Jim wolle fansels ek wol wat positivere ferhalen hearre. De muffe Hong Kong-geur hie plak makke foar de frisse Australische wyn. Yn ien wurd: hearlik! Jammer wie wol dat ik der net echt op klaaid wie. In lange broek en twa shirts binne no net echt geskikt foar in temperatuer mei de simmerske waarde fan 28.

Mar dat mocht de pret net drukke! We wienen der eindeliks! We waarden fan it airport ôfhelle troch twa dames fan Australian Backpackers -de organisaasje wêrmei ik reizgje-. It ferfier gong drekt troch nei it gesicht fan dizze prachtige stêd: The Sydney Opera House. Dit gebou stiet symboal foar Sydney en miskien wol foar hiel Australië.
De rest fan de dei ha we net tefolle dien. Jûns wie der in barbecue mei de hiele groep wêrnei we de kroech yn dûkt binne oant yn de lette oerkes....

Doe wie it ek alwer snein. Mei noch net tefolle sliep yn it lichaam setten we troch nei in prachtich moai park hjir yn Sydney: The Royal Botanic Gardens. Der ha we genoaten fan it útsicht wêrnei we in boattocht makke ha rjochting in strân. Der ha we mei de hiele groep oan it picknicken west. En dat is iets wêr’t se hjir hiel goed yn binne neffens my; picknicke en barbecue. Jûns wie der noch romte om gesamenlyk te iten. Der ha we dan ek mar gebrûk fan makke.
Doe’t ik dernei foar it earst efter ynternet sitten gong kaam my ek al snel temjitte dat myn SDS mei mar leafst 8-0 wûn hie dy sneons. It giet dan wer oer fuotbal. Gean sa troch soe ik sizze, jim ha my hielendal net nedich!!! By it wurd SDS tinke se hjir yn OZ oan hiel oare saken.... Check de foto soe ik sizze!

Moandei waard foar ús in echte 'regel'-dei. We moasten in bankrekkening iepenje, der moast in Medicare-paske (dat is foar de ziektekostenfersekering) oanfrege wurde, plus dat we ek noch nei it Travelers Contact Point moasten. Dat is in bureau spesjaal foar reizgers as my. Der komt ek myn post oan, mochten jimme dat wolle. (Tip...!!!) Oh ja, miskien is it dan ek wol handich om myn adres te jaan:

Dirk-Yde Sjaarda
TCP# 11217
Travelers Contact Point
Level 7, Dymocks Building
428 George Street
SYDNEY NSW 2000

Dernei bin ik ek mar drekt trochsetten om in telefoannûmer te bemachtigjen. Op nei de Vodafoneshop yn de buert. Jim kinne my hjir belje en smse op nummer: 0061 4 24403861. Tink a.u.b. wol efkes om it tiidferskil mochten jim my wolle belje. It is hjir namelyk 8 oeren letter as yn jim kâlde kikkerlandsje...
Doe wie it fansels ek alwer tiid om ris yn it park te picknicken wêrnei it paad troch gong nei in Carmarket. Hjir krigen we wat tips foar de oanskaf fan in auto. Hiel handich! Ik tink dochs dat ik tidens myn trip myn earste eigen auto keapje sil! Lekker frij en eigen baas wêze, liket my hearlik!

The Blue Mountains, dat stie sintraal op tiisdei. Mei in buske waarden we oppikt: op nei de kangoeroes! Dit National Park leit eins krekt bûten Sydney en stiet bekend om de prachtige lânskippen. Yn prinsipe hoech ik der net soad oer te fertellen, de foto's sprekke foar sich. Prachtige natuer mei tal fan lytse én grutte wetterfallen. Gewoan geweldich moai om soks te oanskouwen. We ha der sels ek noch in deadelike slang spotten. Miskien kinne jim him ûntdekke op ien fan de foto's. Bin benijd! Oan'e ein fan de middei ha we ek noch efkes op it Olympysk Park west, ek wolris leuk.
Ien kear wer werom kommen yn it hotel waard de reis wer trochsetten nei The Gaff, dat is in hiel populaire backpackerskroeg. Dit komt foaral omdat der it iten gratis is oant 21.00 oere, derneist is der ek noch in happy hour mei gratis drank fan 21.00 oant 22.00 oere. En alles wat gratis is, der binne wy as backpackers (mei in lytse beurs) gek op!! It feest gong troch nei The World Bar. Ek hjir binne genôch foto's makke, dy wol ik jim net ûnthâlde, te gek foar wurden gewoan......

In bytsje Australiër kin golfsurfe. Fansels moast ik dat ek ûnder de knibbel krije, dus wie it woansdei heech tiid om dat ek ris te ûnderfinen. Mei noch gjin 3 oeren sliep yn de bealch op nei Palm Beach! wat oseaanwetter op'e kop die wûnderen en it surfen gie op sich best goed. Middeis waard it pas echt leuk doe't de golven wat heger waarden. In te gekke erfaring dy't seker in ferfolch krije sil yn de kommende tiid.

No is it alwer tongersdei en sit myn earste wike derop. Hjoed ha'k net in soad dien. Útsliept oant (jawol) 12.00 oere. En dat wie heech nedich ek. Ik wie echt dea-op nei sa'n wike. Ik tink dat it op-stap-gehalte de kommende dagen efkes wat nei beneden sil. Dit om jild én energie te besparjen.

Wat de kommende wike my bringe sil wit ik noch net hielendal. Ik bliuw hjir earst noch in pear dagen yn Sydney. Dernei sil ik tink ik myn heil wat noardeliker sykje rjochting Brisbane. Dat leit sa’n 1000 kilometer heger as Sydney en dêr is sadwaande ek wat waarmer. Boppedat leit der Surfers Paradise der ek yn de buert. Dat skynt in walhalla foar surfers te wezen, sa kin ik moai oan myn surfersskills wurkje.

Fansels moat ik op 1 desimber wol wer op tiid werom yn Sydney wêze om op it fleantúch te stappen rjochting Nieuw-Zeeland. Der kom ik ein jannewaris wer wei om dan at it in bytsje meisit per auto de East-coast bylâns te gean rjochting Cairns.

We sille it sjen!!

Earst mar ris oant safier. Dit is sa stadich ek alwer in hiel ferhaal wurden. Wat ik noch wol efkes kwyt wol is dat ik eltsenien nochris hiel erg bedanke wol foar jim reaksjes via sms, post, e-mail, hyves, waarbenjij.nu. Ik ha it hiel erch wurdearje kinnen dat jim sa goed om my tinke. DANKEWOL!!!

Oant folgende wike!!

Mei in Australische groet,


Dirk-Yde